শ্রীমদ্ভাগবত গীতা - ষষ্ঠ অধ্যায় - সেরা-সংগ্রহ.কম
X

Friday, April 1, 2016

শ্রীমদ্ভাগবত গীতা - ষষ্ঠ অধ্যায়

শ্রীমদ্ভাগবত গীতা

ষষ্ঠ অধ্যায়




শ্রীভগবানুবাচ - অনাশ্রিতঃ কর্মফলং কার্যং কর্ম করোতি যঃ । স সন্ন্যাসী চ যোগী চ ন নিরগ্নির্ন চাক্রিয়ঃ ।। ১

যং সন্ন্যাসমিতি প্রাহুর্যোগং তং বিদ্ধি পাণ্ডব । ন হ্যসংন্যস্তসঙ্কল্পো যোগী ভবতি কশ্চন ।। ২

আরুরুক্ষোর্মুনের্যোগং কর্ম কারণমুচ্যতে । যোগারূঢ়স্য তস্যৈব শমঃ কারণমুচ্যতে ।। ৩

যদা হি নেন্দ্রিয়ার্থেষু ন কর্মস্বনুষজ্যতে । সর্বসঙ্কল্পসন্ন্যাসী যোগারূঢ়স্তদোচ্যতে ।। ৪

উদ্ধরেদাত্মনাত্মানং নাত্মানমবসাদয়েৎ । আত্মৈব হ্যাত্মনো বন্ধুরাত্মৈব রিপুরাত্মনঃ ।। ৫

বন্ধুরাত্মাত্মনস্তস্য যেনাত্মৈবাত্মনা জিতঃ । অনাত্মনস্তু শত্রুত্বে বর্তেতাত্মৈব শত্রুবৎ ।। ৬

জিতাত্মনঃ প্রশান্তস্য পরমাত্মা সমাহিতঃ । শীতোষ্ণসুখদুঃখেষু তথা মানাপমানয়োঃ ।। ৭

জ্ঞানবিজ্ঞানতৃপ্তাত্মা কূটস্থো বিজিতেন্দ্রিয়ঃ । যুক্ত ইত্যুচ্যতে যোগী সমলোষ্টাশ্মকাঞ্চনঃ ।। ৮

সুহৃন্মিত্রার্যুদাসীনমধ্যস্থদ্বেষ্যবন্ধুষু । সাধুষ্বপি চ পাপেষু সমবুদ্ধির্বিশিষ্যতে ।। ৯

যোগী যুঞ্জীত সততমাত্মানং রহসি স্থিতঃ । একাকী যতচিত্তাত্মা নিরাশীরপরিগ্রহঃ ।। ১০

শুচৌ দেশে প্রতিষ্ঠাপ্য স্থিরমাসনমাত্মনঃ । নাত্যুচ্ছ্রিতং নাতিনীচং চৈলাজিনকুশোত্তরম্ ।। ১১

তত্রৈকাগ্রং মনঃ কৃত্বা যতচিত্তেন্দ্রিয়ক্রিয়ঃ । উপবিশ্যাসনে যুঞ্জ্যাদ্ যোগমাত্মবিশুদ্ধয়ে ।। ১২

সমং কায়শিরোগ্রীবং ধারয়ন্নচলং স্থিরঃ । সংপ্রেক্ষ্য নাসিকাগ্রং স্বং দিশশ্চানবলোকয়ন্ ।। ১৩

প্রশান্তাত্মা বিগতভীর্ব্রহ্মচারিব্রতে স্থিতঃ । মনঃ সংযম্য মচ্চিত্তো যুক্ত আসীত মৎপরঃ ।। ১৪

যুঞ্জন্নেবং সদাত্মানং যোগী নিয়তমানসঃ । শান্তিং নির্বাণপরমাং মৎসংস্থামধিগচ্ছতি ।। ১৫

নাত্যশ্নতস্তু যোগোহস্তি ন চৈকান্তমনশ্নতঃ । ন চাতিস্বপ্নশীলস্য জাগ্রতো নৈব চার্জুন ।। ১৬

যুক্তাহারবিহারস্য যুক্তচেষ্টস্য কর্মসু । যুক্তস্বপ্নাববোধস্য যোগো ভবতি দুঃখহা ।। ১৭

যদা বিনিয়তং চিত্তমাত্মন্যেবাবতিষ্ঠতে । নিস্পৃহঃ সর্বকামেভ্যো যুক্ত ইত্যুচ্যতে তদা ।। ১৮

যথা দীপো নিবাতস্থো নেঙ্গতে সোপমা স্মৃতা । যোগিনো যতচিত্তস্য যুঞ্জতো যোগমাত্মনঃ ।। ১৯

যত্রোপরমতে চিত্তং নিরুদ্ধং যোগসেবয়া । যত্র চৌবাত্মনাত্মানং পশ্যন্নাত্মনি তুষ্যতি ।। ২০

সুখমাত্যন্তিকং যত্তদ্‌বুদ্ধিগ্রাহ্যমতীন্দ্রিয়ম্ । বেত্তি যত্র ন চৌবায়ং স্থিতশ্চলতি তত্ত্বতঃ ।। ২১

যং লব্ধ্বা চাপরং লাভং মন্যতে নাধিকং ততঃ । যস্মিন্ স্থিতো ন দুঃখেন গুরুণাপি বিচাল্যতে ।। ২২

তং বিদ্যাদ্দুঃখসংযোগবিয়োগং যোগসংজ্ঞিতম্ । স নিশ্চয়েন যোক্তব্যো যোগোহনির্বিণ্নচেতসা ।। ২৩

সংকল্পপ্রভবান্ কামাংস্ত্যক্ত্বা সর্বানশেষতঃ । মনসৈবেন্দ্রিয়গ্রামং বিনিয়ম্য সমন্ততঃ ।। ২৪

শনৈঃ শনৈরুপরমেদ্ বুদ্ধ্যা ধৃতিগৃহীতয়া । আত্মসংস্থং মনঃ কৃত্বা ন কিঞ্চিদপি চিন্তয়েৎ ।। ২৫

যতো যতো নিশ্চরতি মনশ্চঞ্চলমস্থিরম্ । ততস্ততো নিয়ম্যৈতদাত্মন্যেব বশং নয়েৎ ।। ২৬

প্রশান্তমনসং হ্যেনং যোগিনং সুখমুত্তমম্ । উপৈতি শান্তরজসং ব্রহ্মভূতমকল্মষম্ ।। ২৭

যুঞ্জন্নেবং সদাত্মানং যোগী বিগতকল্মষঃ । সুখেন ব্রহ্মসংস্পর্শমত্যন্তং সুখমশ্নুতে ।। ২৮

সর্বভূতস্থমাত্মানং সর্বভূতানি চাত্মনি । ঈক্ষতে যোগযুক্তাত্মা সর্বত্র সমদর্শনঃ ।। ২৯

যো মাং পশ্যতি সর্বত্র সর্বং চ ময়ি পশ্যতি । তস্যাহং ন প্রণশ্যামি স চ মে ন প্রণশ্যতি ।। ৩০

সর্বভূতস্থিতং যো মাং ভজত্যেকত্বমাস্থিতঃ । সর্বথা বর্তমানোহপি স যোগী ময়ি বর্ততে ।। ৩১

আত্মৌপম্যেন সর্বত্র সমং পশ্যতি যোহর্জুন । সুখং বা যদি বা দুঃখং স যোগী পরমো মতঃ ।। ৩২

অর্জুন উবাচ - যোহয়ং যোগস্ত্বয়া প্রোক্তঃ সাম্যেন মধুসূদন । এতস্যাহং ন পশ্যামি চঞ্চলত্বাৎ স্থিতিং স্থিরাম্ ।। ৩৩

চঞ্চলং হি মনঃ কৃষ্ণ প্রমাথি বলবদ্দৃঢ়ম্ । তস্যাহং নিগ্রহং মন্যে বায়োরিব সুদুষ্করম্ ।। ৩৪

শ্রীভগবান্ উবাচ - অসংশয়ং মহাবাহো মনো দুর্নিগ্রহং চলম্ । অভ্যাসেন তু কৌন্তেয় বৈরাগ্যেণ চ গৃহ্যতে ।। ৩৫

অসংযতাত্মনা যোগো দুষ্প্রাপ ইতি মে মতিঃ । বশ্যাত্মনা তু যততা শক্যোহবাপ্তুমুপায়তঃ ।। ৩৬

অর্জুন উবাচ - অযতিঃ শ্রদ্ধয়োপেতো যোগাচ্চলিতমানসঃ । অপ্রাপ্য যোগসংসিদ্ধিং কাং গতিং কৃষ্ণ গচ্ছতি ।। ৩৭

কচ্চিন্নোভয়বিভ্রষ্টশ্ছিন্নাভ্রমিব নশ্যতি । অপ্রতিষ্ঠো মহাবাহো বিমুঢ়ো ব্রহ্মণঃ পথি ।। ৩৮

এতন্মে সংশয়ং কৃষ্ণ ছেত্তুমর্হস্যশেষতঃ । ত্বদন্যঃ সংশয়স্যাস্য ছেত্তা ন হ্যুপপদ্যতে ।। ৩৯

শ্রীভগবান্ উবাচ - পার্থ নৈবেহ নামুত্র বিনাশস্তস্য বিদ্যতে । ন হি কল্যাণকৃৎ কশ্চিদ্দুর্গতিং তাত গচ্ছতি ।। ৪০

প্রাপ্য পুণ্যকৃতাং লোকানুষিত্বা শাশ্বতীঃ সমাঃ । শুচীনাং শ্রীমতাং গেহে যোগভ্রষ্টোহভিজায়তে ।। ৪১

অথবা যোগিনামেব কুলে ভবতি ধীমতাম্ । এতদ্ধি দুর্ল্লভতরং লোকে জন্ম যদীদৃশম্ ।। ৪২

তত্র তং বুদ্ধিসংযোগং লভতে পৌর্বদেহিকম্ । যততে চ ততো ভূয়ঃ সংসিদ্ধৌ কুরুনন্দন ।। ৪৩

পুর্বাভ্যাসেন তেনৈব হ্রিয়তে হ্যবশোহপি সঃ । জিজ্ঞাসুরপি যোগস্য শব্দব্রহ্মাতিবর্ততে ।। ৪৪

প্রযত্নাদ্‌ যতমানস্তু যোগী সংশুদ্ধকিল্বিষঃ । অনেকজন্মসংসিদ্ধস্ততো যাতি পরাং গতিম্ ।। ৪৫

তপস্বিভ্যোহধিকো যোগী জ্ঞানিভ্যোহপি মতোহধিকঃ । কর্মিভ্যশ্চাধিকো যোগী তস্মাদ্ যোগী ভবার্জুন ।। ৪৬

যোগিনামপি সর্বেষাং মদ্গতেনান্তরাত্মনা । শ্রদ্ধাবান্ ভজতে যো মাং স মে যুক্ততমো মতঃ ।। ৪৭